LÓA – Bætt líðan eftir áföll

Þátttakendur koma úr hópi kvenna sem tóku þátt í Áfallasögu kvenna árin 2018-2019. Forrannsókn Lóu rannsóknarinnar lauk haustið 2022 og hófst aðalrannsóknin haustið 2023 og mun gagnasöfnun standa fram á árið 2025. Mögulegir þátttakendur fá sent boð um þátttöku í tölvupósti og í framhaldinu ítarlegar upplýsingar um tilhögun rannsóknarinnar. Um er að ræða einfalt inngrip, sem felst í hugrænu verkefni og svörun spurningalista, og fer öll þátttaka fram á netinu.

Fyrir þátttakendur í Lóu rannsókninni er mikilvægt að geta þess að nú í janúar 2024 hófst einnig eftirfylgni í langtímarannsókninni Áfallasaga kvenna. Þar eru fyrri þátttakendur beðnir um að svara nýjum spurningalista og fá mögulegir þátttakendur Lóu rannsóknarinnar einnig boð um þátttöku í þá rannsókn. Við leggjum áherslu á að Áfallasaga kvenna og Lóu rannsóknin eru tvær ólíkar gagnasafnanir, þar sem Áfallasaga kvenna fylgir eftir mögulegum heilsufarsáhrifum áfalla til lengri tíma, á meðan Lóu rannsóknin kannar hvort draga megi úr tíðni áleitinna endurminninga eftir áföll með einföldu inngripi. Við hvetjum þig til þátttöku í báðum rannsóknum hafir þú áhuga og tök á því.

Lóu rannsóknin heitir eftir vorboðanum lóunni

og er markmið hennar að kanna hvort einfalt inngrip geti dregið úr áleitnum minningum eftir áföll og þar með haft mikilvæg áhrif á líðan og lífsgæði fólks til betri vegar.

Margt fólk upplifir einkenni áfallastreitu eftir áföll sem hafa mikil áhrif á líðan og lífsgæði þess. Eitt helsta einkenni áfallastreitu  eru áleitnar minningar, eða minningar um áfallið/áföllin sem eru óvelkomnar, vekja sterkar tilfinningar og koma óvænt upp í hugann. Aðgengi fólks að sálrænni meðferð við áfallastreitu er því miður takmarkað og er eitt markmið rannsóknarinnar að auka slíkt aðgengi og þróa einfaldari lausnir til að takast á við þennan alvarlega vanda.

Rannsóknin hefur fengið leyfi Vísindasiðanefndar og verið tilkynnt til Persónuverndar. Farið verður með allar upplýsingar sem þátttakendur veita í rannsókninni samkvæmt ströngustu reglum um trúnað og nafnleynd. Við vonum að sem flestar konur sem fá boð um þátttöku hafi tök og áhuga á að vera með í rannsókninni. Eins og í öllum rannsóknum af þessu tagi, mun góð þátttaka auka réttmæti rannsóknarinnar og þar með aukið líkurnar á því að auka aðgengi og bæta sálræna meðferð fólks sem hefur lent í áföllum. 

RANNSÓKNARTEYMIÐ

STUÐNINGSAÐILAR

HAFÐU SAMBAND