Áfallasaga kvenna kynnt í dag - afallasaga.is
15371
post-template-default,single,single-post,postid-15371,single-format-standard,bridge-core-2.1,ajax_fade,page_not_loaded,,qode-title-hidden,qode-theme-ver-19.7,qode-theme-bridge,disabled_footer_bottom,qode_header_in_grid,wpb-js-composer js-comp-ver-6.1,vc_responsive,elementor-default

Áfallasaga kvenna kynnt í dag

Fréttin birtist á ruv.is 8. mars 2019

Þriðjungur íslenskra kvenna hefur orðið fyrir kynferðislegri áreitni eða ofbeldi í námi eða starfi, þar af um sjö prósent þar sem þær vinna núna. Þetta kemur fram í fyrstu niðurstöðum rannsóknarinnar Áfallasaga kvenna sem verða kynntar í hádeginu í dag, á alþjóðlegum baráttudegi kvenna, í húsi Íslenskrar erfðagreiningar Reykjavík.

Rannsóknin er unnin á vegum Háskóla Íslands í samvinnu við Íslenska erfðagreiningu og er markmið hennar að varpa ljósi á heilsufar kvenna í kjölfar áfalla. Hún hófst fyrir ári og hingað til hafa um 30 þúsund konur tekið þátt, en opið verður fyrir skráningar nýrra þátttakenda til 1. maí á vefnum afallasaga.is.

Samkvæmt fyrstu niðurstöðum er hættan á kynferðislegri áreitni nokkuð breytileg eftir starfsumhverfi. Þannig virðast konur í flug- og ferðaþjónustu vera í nokkuð meiri áhættu en margar aðrar starfsstéttir segir í fréttatilkynningu aðstandenda rannsóknarinnar. Þá er ríflega fimmtungur þátttakenda með sterk einkenni um áfallastreituröskun, en vísbendingar eru um að slík einkenni geti haft í för með sér langvarandi heilsubrest. Konur sem hafa orðið fyrir kynferðislegu eða líkamlegu ofbeldi eru í mestri hættu á að þróa með sér áfallastreituröskun, en einnig eru konur sem lent hafa í öðrum félagslegum áföllum á borð við einelti eða framhjáhaldi í töluvert aukinni áhættu.

„Tíðni áfallastreituröskunar mælist nokkuð hærri í okkar þátttakendahópi en í fyrri rannsóknum. Ástæðan er margþætt en hana má meðal annars rekja til þess að við einskorðum okkur ekki við áföll sem ógna beint lífi einstaklinga heldur tekur rannsóknin einnig til félagslegra áfalla og áhrifa þeirra á einkenni áfallastreitu. Við erum virkilega þakklát fyrir hversu góðar viðtökur rannsóknin hefur fengið og það er sérstaklega ánægjulegt að sjá hversu vel núverandi þátttakendahópur endurspeglar íslensku kvenþjóðina með tilliti til aldurs, búsetu, menntunar og tekna,“ segir Unnur Anna Valdimarsdóttir, prófessor við Læknadeild Háskóla Íslands og aðstandandi rannsóknarinnar.

Fyrr í vetur var greint frá bráðabirgðaniðurstöðum eftir að 24 þúsund konur höfðu tekið þátt. Þar kom í ljós að fjórðungur þeirra kvenna sem svöruðu hafði verið nauðgað eða orðið fyrir nauðgunartilraun. Það er nokkuð hærra hlutfall en í bæði fyrri innlendum og erlendum rannsóknum að sögn Örnu Hauksdóttur, prófessors í Lýðheilsuvísindum við Háskóla Íslands. 

Fundurinn verður í beinu streymi á Facebook-síðu Íslenskrar erfðagreiningar.